అవినీతిపరుల సమాచారం అందించండి..

Posted: 09/13/2014 12:53 PM IST

హర్యానా అసెంబ్లీ ఎన్నికలలో అవినీతి, అక్రమాలకు పాల్పడిన అభ్యర్థుల వివరాలను తమకు తెలియజేయాల్సిందిగా ఆమ్ ఆద్మీ పార్టీ కోరింది. అక్టోబర్ 15న జరగనున్న అసెంబ్లీ ఎన్నికల బరిలో తమ పార్టీ నిలవబోదని ఆ పార్టీ నేత యోగేంద్ర యాదవ్ స్పష్టం చేశారు. అయితే ఈ ఎన్నికల బరిలో నిలవనున్న అవినీతి పరుల జాతకాలను తాము బట్టబయలు చేస్తామని వెల్లడించారు. అవినీతి పరులకు ఓటు వేయవద్దని ప్రజలకు ఈ సందర్భంగా విన్నవించిన ఆయన.. ఇదే విషయాన్ని ఎన్నికల సమయంలో కూడా ప్రచారం చేస్తామని చెప్పారు.

ఈ మేరకు హర్యానా ప్రజలకు ఆయన ఓ ప్రత్యేక టెలిఫోన్ నెంబరు ఇచ్చారు. అవినీతి అభ్యర్థుల వివరాలను సదరు ఫోన్ నెంబరుకు ఇవ్వాలని, ఫోన్ చేసిన వారి వివరాలను గోప్యంగా వుంచుతామని చెప్పారు. ప్రజలతో కలసి, ప్రజాహితం కోసం చేస్తున్న మంచిపనికి ప్రజల సహకారం వుంటుందని యోగేంద్రయాదవ్ ధీమా వ్యక్తం చేశారు. ముఖ్యంగా హర్యానా ఎన్నికలలో జాతీయ పార్టీలు ఖరారు చేసే అవినీతి అభ్యర్థులను జాబితాను పోలింగ్ తేదీకి ముందు ప్రజల్లోకి విడుదల చేస్తామన్నారు. హర్యానాలో తాము బలంగా లేమని, అందుచేతనే తాము ఎన్నికల బరిలో నిలవడం లేదని చెప్పారు.

జి.మనోహర్