ఇకపై మొబైల్ ద్వారా ఆధార్ కార్డుల జారీ

Posted: 09/14/2014 11:35 AM IST

రాష్ర్టంలో చాలామంది ప్రజలకు ఆధార్ కార్డులు లేకపోవటంపై ఏపీ ప్రభుత్వ స్పందించింది. ప్రతి ప్రభుత్వ పధకానికి ఆధార్ తప్పనిసరి కావటంతో అందరికి ఆధార్ కార్డు ఉండాలని భావిస్తోంది. కార్డులు లేని వారు తీసుకునేందుకు తిరిగి అవకాశం ఇస్తోంది. మొబైల్ వాహనాల ద్వారా ఆధార్ కార్డులు అందిస్తామని ఏపీ పౌరసరఫరాల శాఖ మంత్రి పరిటాల సునీత తెలిపారు. తూర్పుగోదావరి జిల్లాలో మీడియాతో మాట్లాడిన మంత్రి త్వరలోనే మొబైల్ వాహనాలను ప్రారంభిస్తామన్నారు. అటు బోగస్ రేషన్ కార్డులు ఏరివేసేందుకు కూడా చర్యలు చేపట్టినట్లు చెప్పారు.

నిత్యావసర సరుకులు, రేషన పంపిణీలో అక్రమాలు నిరోధించేందుకు కొత్తగా ఈ -పాస్ విధానం అమలు చేస్తామన్నారు. తూర్పుగోదావరి జిల్లాలో దీన్ని పైలట్ ప్రాజెక్టుగా చేపడుతున్నామన్నారు. ప్రతి పధకాన్ని ఆధార్ తో అనుసంధానం చేస్తామని మంత్రి చెప్పారు. ధాన్యం కొనుగోలు విషయంలో రైతులు లాభపడేలా చర్యలు తీసుకుంటామన్నారు. పలు కార్యక్రమాల్లో పాల్గొనేందుకు సునిత శనివారం రోజు రాజమండ్రి పట్టణానికి వచ్చారు.

కార్తిక్