బీజేపికి మద్దతుపై ఇప్పటికైతే నిర్ణయం తీసుకోలేదు..!

Posted: 10/19/2014 11:32 AM IST

Not yet taken decision to support bjp says shiv sene

మహారాష్ట్రలో ఓటరు ఏ ఒక్క పార్టీ వైపు పూర్తిగా మొగ్గలేదు. అన్ని ప్రధాన రాజకీయ పార్టీలు ఒంటరిపోరుకు దిగిన నేపథ్యంలో ఓటరు.. తీర్పును ఇవ్వడంలో కూడా తర్జనభర్జనకు లోనైనట్లు స్పష్టమవుతోంది. ప్రధాని మోడీ ప్రసంగానికి సమ్మోహనులైన మహారాష్ట్ర వాసులు బీజేపీని అతిపెద్ద పార్టీగా అవతరించేలా చేసినా.. అధికారానికి మాత్రం అమాడ దూరాన్ని ఉంచారు. అయితే ఆ పార్టీకి పూర్తి మెజార్టీ వచ్చే అవకాశం కనిపించడంలేదు. శివసేన రెండవ స్థానంలో ఉంది. మూడవ స్థానం కోసం కాంగ్రెస్, ఎన్సీపి పోటీ పడుతున్నాయి. రాజ్ ఠాక్రే పార్టీ మహారాష్ట్ర నవనిర్మాణ సమితి(ఎంఎన్ఎస్) అసెంబ్లీ ఎన్నికలలో పూర్తిగా చతికిలపడి 4 స్థానాలలో మాత్రమే ఆధిక్యతలో ఉంది.

ప్రభుత్వ ఏర్పాటుకు బీజేపీకి ఏదో ఒక పార్టీ మద్దతు అవసరంగా వుంది. అయితే సాధారణ చాయ్ వాలా.. ప్రధాన మంత్రి కాగలిగినప్పడు.. తానెందుకు ముఖ్యమంత్రి కాలేను అని తన మనస్సులోని అంతరార్థాన్ని బయటపెట్టిన శివసేన అధినేత ఉద్దవ్ థాకరే.. బీజేపికి మద్దతు ఇచ్చేందుకు పునరాలోచనలో పడ్డారు. ఈ అంశంపై ఇంకా నిర్ణయం తీసుకోలేదని శివసేన స్పష్టం చేసింది. పూర్తి ఫలితాలు వెలువడిన తర్వాతే మద్దతుపై నిర్ణయం తీసుకుంటామని పేర్కొంది.

జి.మనోహర్