టీడీపీకి అండగా నిలుస్తున్న కాంగ్రెస్

Posted: 11/15/2014 01:00 PM IST

రాజకీయ పార్టీల సిద్దాంతాలు వేరయినా.., అధికార పార్టీపై ప్రతిపక్షాలు అన్ని కలిసి దాడి చేయటం సహజమే. ప్రస్తుతం తెలంగాణ అసెంబ్లీలో ఇదే జరుగుతోంది. సిద్ధాంత పరంగా కాంగ్రెస్, టీడీపీ రాజకీయ శత్రువులు. అయితే తెలంగాణ అసెంబ్లీలో మాత్రం టీడీపీ కోసం కాంగ్రెస్ గొంతెత్తి నినదిస్తోంది. టీడీపీ సభ్యులను సస్పెండ్ చేయటంపై కాంగ్రెస్ నేత మల్లు భట్టి విక్రమార్క సహా ఇతర కాంగ్రెస్ సభ్యులు ప్రభుత్వ వైఖరిని తప్పుబట్టారు. కవితను విమర్శించినందుకే టీడీపీ సభ్యుల్ని సస్పెండ్ చేసినట్లు స్పష్టమవుతోందని విక్రమార్క ఆరోపించారు. ప్రతిపక్షాలు హుందాగా వ్యవహరిస్తుంటే అధికార పక్షం మాత్రం రాద్దాంతం చేస్తోందని ఆయన విమర్శించారు.

ఇక బీజేపి సభ్యులు కూడా ప్రభుత్వ వైఖరిని తప్పుబట్టారు. టీడీపీ సభ్యులు ఎలాంటి వివాదాస్పద వ్యాఖ్యలు చేయలేదని తెలంగాణ బీజేపీ అధ్యక్షుడు కిషన్ రెడ్డి స్పష్టం చేశారు. టీఆర్ఎస్ ఒక చెడు సాంప్రదాయానికి తెరతీస్తోందని ద్వజమెత్తారు. సస్పెన్షన్ ఉపసంహరించుకుంటే ప్రభుత్వానికి హుందాగా ఉంటుందని చెప్పారు. శాసనసభ్యులుగా సభలో మాట్లాడే హక్కు అందరికి ఉందనీ.., ఈ విషయంలో ఎవరినీ అపహాస్యం చేయాల్సిన అవసరం లేదని కిషన్ రెడ్డి చెప్పారు.

కార్తిక్