వీడని వివాదాలు.., తెలంగాణ చట్టానికి మరోసారి సవరణ...?

Posted: 12/12/2014 07:57 AM IST

విభజన తర్వాత పరిష్కారం అవుతాయనుకున్న సమస్యలు మరింతగా పెరుగుతున్నాయి. రోజు రోజుకూ తెలంగాణ, ఏపీ రాష్ర్టాల మద్య ప్రతి విషయంలో అభ్యంతరాలు వస్తున్నాయి. అటు విభజన చట్టంలో ప్రస్తావించిన చాలా అంశాలు పరిష్కారం దిశగా అడుగులు వేయటం లేదు. ప్రధానంగా విద్యుత్ పంపిణీ, ఉద్యోగుల విభజన, ప్రభుత్వ రంగ సంస్థల నిధుల పంపిణీ వంటి విషయాల్లో ఇంకా స్పష్టత రాలేదు. ఈ నేపథ్యంలోనే విభజన చట్టానికి మరోసారి సవరణ చేయాలని కేంద్రం యోచిస్తోంది. గతంలో పోలవరం ముంపు గ్రామాలను తెలంగాణ నుంచి ఏపీలోకి కలుపుతూ తొలి సవరణ చేశారు.

ఇప్పుడు విద్యుత్ పంపిణీతో పాటు, ఇతర ప్రధాన సమస్యలకు పరిష్కారం చూపేలా రెండవ సవరణ చేయాలని కేంద్రం యోచిస్తోంది. ఈ మేరకు హస్తిన పర్యటనలో ఉన్న గవర్నర్ నుంచి సవరణపై సమాచారం సేకరిస్తోంది. ప్రధాని నరేంద్రమోడి ఇవాళ స్వయంగా నరసింహన్ తో సమావేశమై ఈ విషయంపై చర్చించనున్నారు. సవరణ వల్ల కలిగే ఉపశమనంతో పాటు, రెండు రాష్ర్టాల మద్య సమస్యల శాశ్వత పరిష్కార మార్గాలపై చర్చించనున్నారు. అటు ఇప్పటికే కేంద్ర హోంమంత్రి రాజ్ నాథ్ సహా వివిధ శాఖల కీలక ఉన్నతాధికారులతో సమావేశమైన నరసింహన్ తెలుగు రాష్ర్టాల్లో పరిస్థితులను వివరించారు. ఇవాళ జరిగే సమావేశంలో తెలంగాణ, ఏపీ తగాదాలపై కీలక నిర్ణయం తీసుకునే అవకాశముంది.

 

కార్తిక్